Tolosaldeko Hitza

Eskualdekoak garaile Gipuzkoako Txapelketan

Txirrindularitza Ane Usabiaga kadeteetan, Irene San Sebastian juniorretan eta Arantzazu Azpiroz seniorretan, txapeldunak.

i. garciA

Gipuzkoako Emakumezkoen Txirrindularitza Txapelketa izan zen jokoan pasa den igandean Zizurkilen eta Villabonan eta eskualdekoak izan ziren garaile. Kadete mailan Tolosa CF taldean aritzen den Ane Usabiaga ordiziarrak irabazi zuen txapelketa. Juniorretan Irene San Sebatian tolosarra, Debabarrena taldekoa, izan zen garailea. Senior milan Bizkaia taldeko Arantzazu Azpiroz berastegitarra izan zen lehena helmugan.

Patxi Altuna antolatzaileak azaldu duenez, «dena oso ondo joan zen» antolakuntzaren aldetik. «Gure helburua zen proban segurtasuna bermatzea eta lortu genuela uste dugu. Gipuzkoako zein Euskadiko federazioek zoriondu gintuzten horregatik».

Xoxoka erabakigarri

Aurtengoan ibilbidea aldatu zuten, hain justu N-1 errepidea ekiditeko eta probak segurtasuna irabazteko. Ordiziara joan beharrean, proba Andoain aldera joan zen Xoxoka mendatea igoz. Hor erabaki zen bai juniorren bai seniorren txapelketa.

Arantzazu Azpirozek izan zen proba mugitu zuenetako bat mendatean gora eta berarekin batera 20 txirrindulari inguru aldegin zuten, horien artean hiru junior. Talde horretatik atera ziren gero bai seniorretan eta bai juniorretan txapelketa irabazi zutenak.